Santiago, 21 de setembro.  Esta tarde comezou en Santiago o ciclo de seminarios de transferencia  titulados “Libra de Oficio” que organiza o Centro de Investigación Interuniversitario ECOBAS. Este centro de I+D+i traballa no eido da sustentabilidade económica, ambiental e social. Ademais apoia o Máster Interuniversitario en Economía, e o Programa de Doutoramento Interuniversitario en Análise Económica e Estratexia Empresarial das tres universidades galegas.  

Dentro das actividades do presente ano académico, ECOBAS está a levar a cabo dous novos ciclos de seminarios, os Seminarios de Investigación (seminarios científicos con relatorios sobre economía de investigadores e investigadoras de excelencia, nacionais e internacionais) e os Seminarios de transferencia titulados “Libra de Oficio”, que apoian o emprendemento, a empresa galega, a creación de emprego, a igualdade de xénero, o sistema cooperativista, etc.

Para apoiar o inicio deste novo ciclo de seminarios, ECOBAS contou cunha madriña de excepción, Elena Ferro, Premio Nacional de Artesanía 2019. A zoqueira de Merza conversou cos asistentes ó seminario sofre Eferro, a empresa familiar con máis de cen anos de tradición no oficio dos zocos e a marroquinaría.A cita tivo lugar no Museo do Pobo Galego, en Santiago de Compostela, e contou coa presenza de Carlos Hervés e María Loureiro, director e directora científica de ECOBAS.

Ó final do evento, o público  participou no sorteo duns zocos Eferro.