Isabel Neira, nova directora da Escola de Doutoramento Internacional da USC
Investigadora especialista en economía aplicada con especial interese no capital humano, o capital social, o benestar subxectivo, o emprendemento e a innovación, a coordinadora de Transferencia de ECOBAS Isabel Neira é dende o pasado 28 de xaneiro Directora da Escola de Doutoramento Internacional (EDIUS) da Universidade de Santiago de Compostela (USC).
Anteriormente coordinadora das actividades formativas do Programa de Doutoramento de Economía e Empresa e secretaria académica da EDIUS, Isabel ten dirixido un total de dez teses de doutoramento en áreas como emprendemento, calidade educativa e converxencia económica.
Catedrática de Economía na USC, a profesora Neira asume esta nova responsabilidade á fronte da EDIUS logo de moitos anos orientada á xestión do talento e o apoio ao desenvolvemento de carreiras académicas, deixando patente en toda a súa traxectoria a importancia que confire a este tema. Xa na súa propia tese debuxou este foco, no ano 1998, cando obtivo o título de doutora co traballo “Educación e crecemento mundial: Estudio econométrico do impacto de capital humano”.
Directora Técnica do equipo GEM Galicia, Isabel Neira adica tamén o seu esforzo en dinamizar a transferencia do coñecemento á sociedade. Dende a aplicación dos resultados da súa investigación a múltiples campos como o sector turístico, a xestión cultural ou o benestar nas organizacións, ata o fomento das interrelacións de valor entre actores para a xeneración de propostas de valor.
Isabel Neira foi presidenta da Asociación da Economía da Educación, colaborando coas axencias de calidade galega ACSUG e estatal ANECA en diversos proxectos. Directora do Curso de experto en Coaching da USC (2013-2018) e do Curso de Experto en Xestión Cultural desde 2014.
