ECOBAS recibe o galardón como Centro Colaborativo no evento de recoñecemento da rede CIGUS de excelencia investigadora
- No evento da Xunta de Galicia, ao que acudiron os reitores das tres universidades do SUG, recoñeceu a excelencia investigadora que aglutinan os centros CIGUS: CIQUS, IGFAE, CIMUS, CITIUS, CRETUS, ATLANTTIC, CINBIO, CIM, CITIC e CICA.
- Xunto a ECOBAS, único centro interuniversitario, recibiron o distintivo como Centros Colaborativos o CINTECX da UVIGO e o CITEEC da UDC.
Santiago de Compostela, 11 de febreiro de 2025.- ECOBAS, o Centro de Investigación Interuniversitario da Economía e da Empresa, foi recoñecido este martes na Cidade da Cultura coa distinción como Centro Colaborativo da Rede CIGUS de excelencia investigadora de Galicia.
Da man do Secretario Xeral de Universidades, José Alberto Díez de Castro, a directora científica de ECOBAS e catedrática da Universidade de Santiago de Compostela (USC), María Loureiro, foi a encargada de recoller este galardón no marco do acto organizado pola Xunta de Galicia para o recoñecemento aos Centros CIGUS e a posta en valor da investigación científica como motor de progreso de Galicia.
A rede CIGUS
No acto presidido polo presidente da Xunta de Galicia, Alfonso Rueda, os máximos responsables dos centros CIGUS recibiron os correspondentes premios á excelencia investigadora: o Centro Singular de Investigación en Química Biolóxica e Materiais Moleculares (CIQUS); o Instituto Galego de Física de Altas Enerxías (IGFAE); o Centro Singular de Investigación en Medicina Molecular e Enfermidades Crónicas (CIMUS); o Centro de Investigación Singular en Tecnoloxías Intelixentes (CITIUS); e do Centro de Investigación Interdisciplinar en Tecnoloxías Ambientais (CRETUS), o Centro de Investigación en Tecnoloxías de Telecomunicación(AtlanTTic), o Centro de Investigación en Nanomateriais e Biomedicina (CINBIO), o Centro de Investigación Mariña (CIM), o Centro de Investigación en Tecnoloxías da Información e as Comunicacións (CITIC) e o Centro de Investigacións Científicas Avanzadas (CICA).
A Rede CIGUS, que actualmente conta con 1.600 investigadores e captou nos últimos catro anos máis de 180 millóns de euros en proxectos competitivos, é un modelo único en España cofinanciado no marco do programa operativo Feder Galicia 2021-2027.
Os Centros Colaborativos
Xunto a ECOBAS -único centro interuniversitario en acadar esta acreditación- recibiron os seus correspondentes distintivos na categoría de Centros Colaborativos o Centro de Investigación en Tecnoloxías, Enerxía e Procesos Industriais (CINTEXCX) da UVIGO e o Centro de Innovación Tecnolóxica en Edificación e Enxeñería Civil (CITEEC) da UDC.
