14/06/2022

ECOBAS colaborará coa Asociación Amicos na limpeza de praias

O Centro de Investigación Interuniversitario ECOBAS colaborará na limpeza de praias da zona de Vigo no marco dunha das actividades organizadas polo proxecto RE-MAR III, impulsado pola Asociación Amicos xunto co Parque Nacional Marítimo-Terrestre das Illas Atlánticas. Trátase dun proxecto que emprega a ciencia cidadá para reforzar a colaboración entre os sectores pesqueiros e máis estreitamente ligados ao mar, a poboación local, e os visitantes das Illas Atlánticas de Galicia e a súa área de influencia, na busca dun modelo baseado na conservación da contorna litoral e mariña.

Crearase un Equipo ECOBAS ao que poderán unirse todas as persoas, pertencentes ou non ao Centro, interesadas en participar nesta iniciativa e aportar o seu grao de area. Para sumarse a este equipo é preciso cumprimentar este formulario antes do martes 28 de xuño, indicando os datos persoais solicitados e a data ou datas nas que se desexe asistir (12 ou 19 de xullo). A actividade desenvolverase en horario de mañá o día que resulte seleccionado por un maior número de persoas. ¡Todas as persoas participantes recibirán un agasallo do Centro!