O investigador de ECOBAS e profesor da Facultade de Ciencias Empresariais e Turismo da UVIGO Ángel Barajas arranca o mandato como novo presidente da Sociedad Española de Economía del Deporte (SEED), cargo que ostentará ata o ano 2028.

Profesor de Economía Financeira e Contabilidade, está especializado no ámbito das finanzas deportivas e o capital intelectual, tendo publicado numerosos artigos onde analiza a sostibilidade económica de clubs de fútbol, a gobernanza no deporte e a influencia das normas de control financeiro.

O obxectivo da sociedade que agora preside, e que organiza anualmente o Congreso Iberoamericano de Economía del Deporte, é fomentar a actividade académica e investigadora desde a perspectiva da análise económica e a xestión das entidades e empresas deportivas, tanto de natureza pública como privada.

Os retos que encarará o equipo directivo que encabeza, conformado por especialistas doutras seis universidades estatais, son consolidar a actividade da SEED, promovendo a transferencia de coñecemento no seu ámbito de actuación, así como fomentar a investigación en deportes emerxentes e minoritarios, a igualdade de oportunidades e a sostibilidade.