O relevo xeracional é unha das cuestións clave que afectan á concepción das empresas familiares, dende a definición do modelo de negocio ata a súa evolución e crecemento, consolidación e sostibilidade a longo prazo. Dende o seu nacemento a propiedade recae no seo da familia fundadora, e a vocación de mantemento desta concepción conleva múltiples implicacións en termos de gobernanza, conceptualización de produtos, plans de expansión e internacionalización, etc.

Polo seu carácter estratéxico e co obxectivo de dar a coñecer a visión e as aprendizaxes deste proceso nunha compañía emblemática da nosa contorna que hoxe transcende moito máis aló das nosas fronteiras, a Cátedra de Empresa Familiar da UVIGO que dirixe a investigadora permanente de ECOBAS Elena Rivo organiza esta conferencia, na que teremos o pracer de escoitar en primeira persoa a Antón Fonseca Fernández, CEO e vicepresidente do Grupo Terras Gauda e presidente do Fórum Familiar da Asociación Galega de Empresa Familiar.

O acto será presentado polo vicerreitor do Campus de Ourense da Universidade de Vigo, Javier Rodríguez Rajo.