O impacto da contaminación por plásticos nos ecosistemas marítimo-terrestres e na vida humana é un dos maiores desafíos que afrontamos como sociedade. O plástico non se biodegrada; pode tardar ata centos de anos en descompoñerse así que, cando se desbota, orixina un problema de graves consecuencias con múltiples derivadas. É un tipo de contaminante que asfixia á fauna marina, deteriora o solo, envenena as augas subterráneas e que pode causar graves danos tamén na saúde humana.

Para abordar as distintas estratexias na loita contra este grave problema, coordinadas pola directora do Instituto Universitario de Estudios Marítimos (IUEM) e investigadora principal de ECOBAS, María Isabel Novo Corti, e da profesora María José Rodríguez Docampo, os vindeiros 26 e 27 de setembro terán lugar as xornadas divulgativas tituladas “Novas perspectivas para a regulación, control e xestión dos verquidos de plásticos ao mar”.