ECOBAS participa na Noite das Persoas Investigadoras con actividades gratuítas de divulgación científica para achegar a ciencia á cidadanía e espertar vocacións científicas. Será unha tarde de lecer e unha mirada aberta á xeneración de coñecemento. A G-Night aúna de forma atractiva e divertida investigación, cultura científica e educación para toda a familia.

A CORUÑA >> Economízate

LUGAR | Dársena da Mariña (inmediacións Sede Autoridade Portuaria)

Queres coñecer como funciona a economía, como impacta no teu día a día? Achégate ao noso espazo para descubrir e aprender xogando. Haberá agasallos para todos!

A regra 50-30-20

Ordena as túas finanzas persoais, gastos, aforros… Como facelo ben? Actividade para maiores de 14 anos.

O Laboratorio da Substitución

Veremos como non todas as economías responden igual cando cambian as condicións. Experimenta con diferentes combinacións de factores de produción e descubre como a elasticidade de substitución pode impulsar, ou limitar, o crecemento económico. Actividade para maiores de 14 anos.

Tractor ou nada

A través dun percorrido por este taboleiro, simulación dunha granxa, a rapazada aprenderá como desenvolver unha idea que lles permita acadar o reto: mercar un tractor ecolóxico. Terán que plantar sementes, obter a colleita, enfrontarse a unha xeada, cobrar intereses, pagar impostos, etc., e obterán recompensas tanto económicas como en especie. Actividade para menores de 12 anos.

Deseña unha Alianza Europea de Universidades

Para construír a universidade do futuro: como se crea unha alianza entre universidades de distintos países? Xogando en equipo, participarás no deseño dunha proposta de alianza a partir de universidades reais e dos seus contextos territoriais. Misión, valores, principais liñas de actuación, proxectos… Terás que tomar moitas decisións estratéxicas. Verás a túa proposta en relación co que esas mesmas universidades crearon na realidade. Actividade para maiores de 15 anos.

Andaina de Marketing

Ven connosco a visitar un establecemento comercial de Inditex (en Rúa Compostela, A Coruña) para coñecer de que maneira o punto de venda pode influír no consumidor e no seu comportamento, empregando variables de marketing coma a disposición do produto dentro da tenda, o emprego da cor, a iluminación, ou as zonas con ofertas comerciais. A andaina basearase na proposta científica do modelo S-O-R de Mehrabian e Russell (1974) e de Donovan e Rossiter (1982). A investigadora de ECOBAS e catedrática da área de Marketing da UDC, Cristina Calvo Porral, conducirá esta andaina.
Hora: 16:00 h · Duración: 30 minutos · Actividade para todas as idades · PRAZAS LIMITADAS · Imprescindible INSCRICIÓN AQUÍ

VIGO >> Natureza, empresa, ciberespazo? Bingo!

LUGAR | Edificio Redeiras (Rúa Ribeira do Berbés), 3º andar

Porque somos seres sociais que interactuamos coa natureza e porque a actividade humana impacta en todo o que nos rodea, en modo analóxico e en dixital, convidámosvos a un percorrido polos temas da investigación en sostibilidade cos que, sen sabelo, gobernan cada día distintos aspectos das nosas vidas. Participa nos diversos obradoiros que temos preparados. Teárs agasallo asegurado! 

Descubre a túa pegada ecolóxica

Cantos planetas serían necesarios se todas as persoas vivisen coma ti? Nesta actividade interactiva poderás calcular a túa pegada ecolóxica mediante unha ferramenta dixital sinxela e intuitiva. Descubrirás como os teus hábitos de vida inflúen sobre os recursos do planeta e coñecerás pequenas accións cotiás coas que contribuír a reducir a túa pegada, protexer a natureza e transitar cara a unha economía mais circular e sostible.

Desafío Climático

E se puideras contribuír a salvar o planeta? Pon a proba os teus coñecementos sobre o cambio climático nunha experiencia express e resultados en tempo real, sen necesidade de experiencia previa, ideal para calquera idade.

Escapa dos bulos con ciencia

Ponte a proba coa nosa “Escape Box”: atrévete a salvar unha empresa que corre serios riscos por culpa do efecto de mitos e bulos que amenazan a súa actividade e que ti deberás desmontar. O propósito, a sostibilidade e a competitividade, a innovación, a intelixencia artificial, a estratexia empresarial… ofrecerán un percorrido de retos que resolver. Deberás seguir as diferentes pistas, desvelar o que agochan… e lograr abrir a caixa. Conseguirás o teu agasallo! E será empregando a ciencia como ferramenta (infalible) contra a desinformación.

SANTIAGO DE COMPOSTELA >> Os teus cartos, o teu benestar

LUGAR | Claustro de Fonseca, s/n

A oca do teu peto é o xogo co que descubrirás a relación das persoas co diñeiro, un asunto que moito nos intriga e que imos explorar en vivo. Participa, pregunta, xoga, aprende, divírtete connosco e consegue o teu agasallo. Haberá para todos!